Die koninkryk van God in die NT

Die koninkryk van God in die Nuwe Tesament

Inleidend

Kom ons kyk net eers weer wat die kern van die koninkryk van God in die Ou Testament behels. In die vorige artikel het ons agtergekom dat die begrip "Koninkryk van God" nie in die Ou Testament voorkom nie, maar dat die saak wel deeglik daar ter sprake kom. Dit gaan daar naamlik om die Almagtige Skeppergod wat self vir hom mense kies om aan die hand van sy eie stel grondreëls op aarde in die land Palestina en hoofsaaklik deur die volk Israel te regeer. Hy doen dit deur 'n missionêre stryd sodat die wêreld kon weet dat hierdie Here die enigste ware God is.

Die fokus van die Evangelie

In die NT is dit baie duidelik dat die fokus van die Evangelie te make het met die sigbaar word van God se koninkryk. Johannes die Doper wat as voorloper van Jesus se koms sou optree begin reeds deur te verkondig: “Bekeer julle, want die koninkryk van die hemel het naby gekom.” (Mat 3:2). Sy hele bediening was dus daarop gerig om mense bewus te maak van die feit dat daar binnekort iets gaan gebeur wat die heerskappy van God op aarde 'n werklikheid gaan maak. Wanneer hierdie gebeurtenis realiseer en die Messias in die persoon van Jesus kom, word die hele bediening van Jesus saamgevat met die woorde: “Die tyd het aangebreek, en die koninkryk van God het naby gekom. Bekeer julle en glo die evangelie.” (Mark 1:15). Die feit dat die hele fokus van God se Woord te make het met God se koninkryk word bekletoon wanneer Jesus na sy opstanding die tyd saam met sy volgelinge benut deur verder met hulle oor "die dinge van die koninkryk van God" (Hand 1:3) te praat.

Hoe lyk die koninkryk in die NT?

Alhoewel Jesus dit baie duidelik stel dat sy koninkryk nie 'n aardse bestemming het nie, maar eintlik 'n bo-natuurlike dimensie betree (Joh 18:36 “My koninkryk is nie van hierdie wêreld nie,”) is dit tog ook baie duidelik dat God se koninkryk 'n duidelike effek reeds hier op aarde in mense se lewens het. Die volgende help ons om dit te verstaan:

Die gebroke werklikheid word deurbreek. Op baie verskillende kere gryp Jesus in en verander mense se lot. So maak Hy dikwels siek mense gesond, selfs dooies word weer lewendig, Hy voorsien voedsel vir hongeriges, ens. Jesus se wonderwerke moet altyd verstaan word as maniere waarop Hy die oorwinnende krag van God se koninkryk op aarde as 'n sigbare realliteit wou bekend stel.
Die koninkryk van die Bose word deurbreek. By verskillende geleenthede toon Jesus aan dat God heers oor die bose. Jesus dryf duiwels en bose geeste uit mense uit. Die bose geeste herken hom selfs as die Seun van God en is bang vir hom.
Die ewige heil word aangekondig. Tot dusver was die verlossing van sonde net 'n belofte waarop gewag moes word. Met die koms van Jesus word hierdie belofte in vervulling gebring sodat die heil 'n werklikheid geword het. Jesus oorwin deur sy opstanding die mag van die dood sodat dit 'n nuwe betekenis kan kry vir die mense wat God se koninkryk deelagtig kan word.
Demonstrasie van ware liefde. Dwarsdeur alles wat Jesus kom doen het, het Hy eintlik kom demonstreer dat God se koninkryk ten nouste te make het met die betoning van opregte liefde. Daarmee gee Jesus uiting aan die bedoeling van God se koninkryk naamlik om liefde te laat geld.

"... die dinge van die koninkryk..."

As die hele NT se fokus afgestem is op die koninkryk van God en as Jesus selfs in die kosbare tydjie voor sy hemelvaart moeite doen om oor verskillende aspekte daarvan met sy volgelinge te praat, dan is dit belangrik om kennis te neem van die sake wat ter sprake is:

Die bergrede. Langs die meer van Kapernaum onderrig Jesus sy volgelinge in verband met die dinge van die koninkryk en praat met hulle oor die volgende temas:
1. afhanklikheid van God (Mat 5:3)
2. deeglike sondebesef (Mat 5:4)
3. sagmoedigheid (Mat 5:5)
4. die eis om vredemakers te wees (Mat 5:9)
5. gewilligheid om vervolg te word ter wille van jou geloof (Mat 5:11)
6. maak 'n verskil deur soos sout en lig te werk (Mat 5:13-14)
7. die betekenis van ware liefde (Mat 517)
8. leef versoenend (Mat 5:23)
9. kuisheid (Mat 5:27-29)
10. egskeiding (Mat 5:31)
11. eedswering (Mat 5:33vv)
12. liefde en vergelding (Mat 5:38vv)
13. barmhartigheid (Mat 6:1vv)
14. hoe om te bid (Mat 6:5vv; 7:7vv)
15. die fokus van jou lewe (Mat 6:19vv)
16. oordeel en kritiek (Mat 7:1vv)
17. die egtheid van geloof kom na vore in jou manier van doen, jou dade (Mat 7:21vv)
Die gelykenisse. Dit is opvallend dat Jesus deur middel van die beeldspraak wat in gelykenisse gebruik word 'n hele klomp aspekte van God se koninkryk aan sy volgelinge verduidelik. Van die bekendste gelykenisse is die een van die boer wat saad gaan saai. Die saad val op verskillende tipes grond en eers wanneer dit in die goeie grond val, groei dit reg en dra vrug. 'n Ander gelykenis oor die koninkryk is die een van die koning wat sy verteenwoordigers stuur om te kyk of sy grond goed bestuur word. Die verteenwoordigers word telkens doodgemaak. Selfs toe die koning sy seun stuur, word hy ook om die lewe gebring. Die gelykenis oor die verskillende talente is nog 'n verhaal waardeur Jesus bepaalde aspekte van God se koninkryk aan die mense verduidelik.

Ten slotte.

As mens mooi na bogenoemde "dinge van die koninkryk" kyk, dan kom die volgende kenmerke duidelik na vore:

Die koninkryk duur tot in ewigheid en skep dus by mense 'n verwagting van hoop op die hiernamaals
Die koninkryk en die hoop wat daardeur gebied word, kan slegs deur geloof uit God se hand aanvaar word. Hy gee dit aan ons op grond van sy genade en nie omdat enige iemand dit kan verdien nie. Later in die NT beklemtoon Paulus hierdie aspek geweldig sterk. Dink maar aan sy opmerking in Ef 2:8 Julle is inderdaad uit genade gered, deur geloof. Hierdie redding kom nie uit julleself nie; dit is ’n gawe van God.
As burger van God se koninkryk moet jou geloof in die styl waarvolgens jy elke dag leef aan almal sigbaar word. Eers dan is jou belydenis dat die Here jou Koning is geloofwaardig.
Jou alledaagse styl van lewe volgens die grondbeginsels van God se koninkryk word veral sigbaar in 'n nuwe manier van verhoudings met God en met mense. Die goue reël hiervoor is die betoning van onvoorwaardelike en onselfsugtige opofferende liefde.
Hierdie nuwe manier van verhoudings inrig is veral daarop gerig om 'n verskil te maak in die konteks waar jy elke dag leef. Daarom is een van die belangrikste kenmerke van die koninkryk in die NT die feit dat dit missionêr van aard is. Met ander woorde, dit is daarop ingestel om die wêreld bewus te maak van sy liefde soos Hy dit bekend maak in Joh 3:16. Uiteindelik het die aanbreek van God se koninkryk dus nie sy kerk in die oog nie, maar die wêreld buite die kerk. Die kerk word daarmee die enigste organisasie ter wêreld wat bestaan ter wille van sy nie-lede.

Aan laasgenoemde opmerking sal in die volgende artikel aandag gegee word. Terug na die hoofblad.