Christus alles en in almal - Kol 3:1-17

In die vorige gedeelte (Kol 2) het Paulus die gemeente baie sterk aangespreek oor 'n lewe waarin gepoog word om deur die onderhouding van allerlei mensgemaakte godsdienstige reëls en regulasies in verhouding met God te tree. Al hierdie dinge is maar net 'n valse skyn van godsdienstigheid en bring jou nêrens nie. Toe het hy al in vers 20 gesê: "Julle het saam met Christus gesterwe en is dus dood vir die wettiese godsdienstige reëls van hierdie wêreld". Hy roep elke gelowige op om te leef soos mense wat aan Christus behoort.
In Kol 3 kom gee hy nou die heel sterkste motivering waarom hierdie leefstyl so belangrik is. Dit word kort en kragtig saamgevat met die woorde: "Christus alles en in almal". Oordink die volgende gedagtes wat oor hierdie hoofstuk gemaak word en vra uiteindelik vir die Here om vir jou te wys hoe Hy wil hê hierdie ideaal in jou lewe verwesenlik moet word.

Gelowiges het ’n nuwe status

Die gelowige se identiteit word sterk bepaal deur sy geloofsverbintenis met Jesus Christus. Dit bestaan uit die volgende elemente:

Jou status word bepaal deur die dood en opstanding van Jesus Christus (vers 1 & 3). Onthou altyd dat Jesus nie ter wille van homself gester het en weer uit die dood uit opgestaan het nie. Hy doen dit om daarmee die bose te oorwin en vir ons dit moontlik te maak om die ewige lewe te kan hê.
Die gelowige word bevry van sy/haar aardse status wat bestaan het uit 'n baie selfgesentreerde manier van lewe.
Elke gelowige is ook nou saam met Christus 'n oorwinnaar oor die bose (Lees ook wat in Rom 8:37 hieroor geskryf is.

Die nuwe status bring ook 'n nuwe verpligting op elke gelowige naamlik dat daar volgens hierdie nuwe status geleef moet word. Die sterkste motivering vir hierdie verpligting word in vers 4 gegee as Paulus skryf: "Wanneer Christus, wat julle lewe is, by sy wederkoms verskyn, sal julle ook saam met Hom verskyn en in sy heerlikheid deel". Gelowiges het dus die voorreg om terwyl hulle nog leef al die versekering te kry dat daar 'n heerlike erfporsie op ons wag as ons die dag te sterwe kom en dit is dat ons die ewige lewe saam met Jesus sal ingaan. Hierdie versekering moet ons aanspoor om so te leef dat almal kan sien dat ons in Jesus 'n nuwe identiteit het.

Leef volgens jou status

Die vraag is nou: hoe lyk 'n mens se styl van lewe waarin jou status as gelowige gesien kan word? Paulus noem hier twee dinge wat van belang is. Mens sou kan sê dat hierdie twee dinge saamwerk soos die twee kante van 'n muntstuk. Geen muntstuk is aanvaarbaar as net sy een kant aan die standaarde wat aan muntstukke gestel word, voldoen nie. As die een kant beskadig is of geen herkenbare patroon vertoon nie, is die hele muntstuk waardeloos. So gaan dit ook met die gelowige se lewe. Aan die eenkant word van jou gevra om sekere positiewe kenmerke te vertoon en aan die anderkant word van jou verwag om sekere negatiewe dinge uit jou lewe te verwyder. Kom ons kyk kortliks wat hierdie positiewe en negatiewe dinge is.

Positiewe dinge: Paulus noem die volgende belangrike sake:
1. Gebruik jou denke reg (3:2 & 1b). Lees gerus ook Fil 4:8. Die denke van die mens is die vertrekpunt van alles in sy lewe. Alles begin by 'n bepaalde besluit wat jy daaroor neem. As die fokus van jou denke dus verkeerd gerig word, gaan jy verkeerde besluite neem en uiteindelik verkeerde dinge sê en doen.
2. Rig jou lewe in volgens God se waardesisteem (3:12-17).Om met geloof aan God verbind te wees, beteken dat jy ook die beginsels van God se Woord as die vertrekpunt van jou doen en late moet neem. Hierdie beginsels sluit dinge in soos liefde, vrede, dankbaarheid. ens. Wie daarvolgens lewe vertoon praktiese eienskappe soos meelewendheid, goedgesindheid, nederigheid, geduldigheid, verdraagsaamheid en vergewensgesindheid.
Negatiewe dinge: Paulus roep die gelowige op om van alles ontslae te raak wat jou verhouding met God en ander mense sal verongeluk. Dit sluit alles in wat iemand kwaad kan aandoen of sy/haar lewe negatief sal beïnvloed. In sy lysie sluit hy dinge in soos onsedelikheid, onreinheid, wellus, slegte begeertes, en gierigheid (wat afgodery is). Verder moet jy ook die volgende laat staan: woede, haat, nyd, gevloek, vuil taal, leuens.

Natuurlik is hierdie lysies nie volledig nie en gaan dit ook nie om die afmerk van items op lysies nie. Die groot ding wat Paulus onder ons aandag wil bring is dat die lewenswyse van die gelowige 'n lewende bewys vertoon van God se liefde in jou lewe. Jy sal dus self moet besluit wat in jou lewe gelos moet word en watter dinge daar meer van sigbaar sal moet word. Die maatstaf moet wees: Alles wat nie opbouend vir mense is nie, moet gelos word en alles waarmee ek God se liefde aan ander kan uitdra, moet gedoen word.

Terug na hoofblad.