Kol 2. Lewe in verbondenheid: met mekaar ... en met Christus Jesus

In aansluiting by die vorige hoofstuk moet onthou word dat Paulus eers 'n dankgebed gedoen het waarin hy die Here loof vir die hoop, geloof en liefde wat Hy aan die gemeente in Kolosse gegee het. Daarna het hy vir hulle voorbidding gedoen. In sy gebed het hy veral aandag gegee aan die feit dat hulle deur die krag van die Heilige Gees meer en meer moet agterkom wat die Here se plan met hulle lewens is. Mens kan nou verwag dat wat in hoofstuk twee gesê word sal aansluit by die eerste hoofstuk. As hy dus hier praat van 'n lewe in verbondenheid, dan is dit nog steeds daarop gemik om die gelowiges te help verstaan hoe 'n mens geestelik tot volwassenheid ontwikkel. Dit gebeur naamlik deur 'n dubbele verbintenis: enersyds is jy verbind aan ander gelowiges en andersyds aan Jesus Christus.

Oordink gerus die volgende opmerkings:

Verbind aan ander gelowiges:

• Verse 2 en 3 stel dit duidelik dat die "gom" van die verbintenis tussen gelowiges is die liefde. Liefde moet jou motiveer om by ander betrokke te wees en hulle ook toelaat om by jou geestelike ontwikkeling betrokke te wees. Dit beteken in die praktyk natuurlik dat jy in aanraking met ander gelowiges moet kom, self daar moet wees waar ander gelowiges is.
• Die doel van die betrokkenheid moet wees om onder die leiding van die Heilige Gees saam te soek na God se plan vir jou lewe en vir julle as gelowiges gesamentlik.
• Daarmee stel Paulus dit baie duidelik dat gelowig wees nie net 'n individuele saak is nie. Natuurlik is dit 'n individuele saak in soverre as wat elkeen vir homself in Jesus moet glo. Niemand kan namens iemand anders glo nie. Maar, vir jou geestelike ontwikkeling en vir die uitbou van die koninkryk van God vorm die gelowiges 'n span wat saamwerk.
• Paulus formuleer dieselfde saak baie mooi in 1 Kor 12:21 "Die oog kan nie vir die hand sê: “Ek het jou nie nodig nie.” Die kop kan weer nie vir die voete sê: “Ek het julle nie nodig nie”.

Verbind aan Jesus Christus:

• Vers 6 word in die Griekse Bybel so geskryf: "en auto peripateite" wat letterlik beteken om "in Hom daagliks te wandel". In die Afrikaanse Bybel word dit vertaal as "in verbondenheid met Jesus Christus lewe". Met ander woorde, Paulus roep die gelowige op om letterlik elke tree van jou daaglikse lewe te gee terwyl jy styf aan Jesus vashou. Dit is dus nie 'n geval van dat jy net in moeilike omstandighede of wanneer jy self nie weet hoe om verder te gaan aan Jesus kom vashou nie, maar dit is 'n geval van elke tree saam met die Here jou pad loop.
• Twee mooi beelde word gebruik om dit te verduidelik. Die beeld van 'n boom se wortels. Net soos geen boom sonder 'n ordentlike wortelstelsel gesond kan ontwikkel en uiteindelik vrugte voortbring nie, netso min kan die gelowige sonder Jesus Christus 'n vrugbare lewe voer (Kyk gerus weer na Joh 15:5 & 6). Die ander beeld is díe van 'n gebou se fondamente. Geen gebou kan bly staan vir baie jare as dit nie op 'n stewige fondasie gebou is nie. Netso belangrik is dit dat elke gelowige se lewe op die regte fondasie gebou moet word. Hierdie fondasie is Jesus Christus (Kyk gerus ook na 1 Kor 3:10 & 11).
• Kyk net wat ontvang die gelowige alles deur in verbintenis met Jesus te lewe:

  1. Dit verbind jou aan God self (vss 9 & 10).
  2. Jy word bemagtig om die Bose te oorwin (vss 10b & 11). Jy hoef dus nie die magte wat jou lewe bedreig in eie krag te probeer oorwin nie (vgl Rom 8:37 & 38).
  3. Jy word van jou sonde bevry (vss 11-12). Soos wat daar letterlik iets van die mens se liggaam afgesny word by die besnydenis, so word jou sonde van jou "afgesny" as jy aan Jesus verbind is. Hiervan was die doop vir die gelowiges van destyds wat groot gedoop is, 'n uitbeelding. Soos wat water die vuilheid van jou liggaam afwas, so word jy van jou sonde skoon gewas as jy aan Jesus verbind is. Let daarop dat Paulus hierdie saak baie sterk stel in verse 13 & 14. Die skuldbewys vir al jou sonde is aan die kruis vasgespyker en tot niet gemaak toe Jesus sy lewe aan die kruis vir jou gegee het. Dit beteken dat jy nooit weer hoef te dink dat die Here enige sonde van jou teen jou sal hou nie. Jy hoef ook nooit weer vir die Here te vra om jou te vergewe nie, want al jou sondes is klaar vergewe. Dit beteken nie dat jy nie oor jou sonde moet berou hê en dit voor God moet gaan erken (bely - 1 Joh 1:9) nie. Dit vra van jou om met berou oor jou sonde vir die Here dankie te sê dat Hy jou vergewe het. Daarna moet jy met die krag van die Heilige Gees gehoorsaam gaan lewe en oorwinning oor jou sonde kry.
  4. Verse 13 en 14 praat ook van die gelowige se nuwe posisie by God. Jy is nou onskuldig verklaar en staan nie meer skuldig voor God nie, selfs al ken jy ook die stryd waarvan Paulus in Rom 7 praat.

  Die enigste opsie:

  • Paulus waarsku teen die dwalinge van die dwaalleraars (vss 16-18). Hy noem hulle manier van godsdiens beoefen menslike pogings wat verwaand is en skyn-godsdiens is. Hy vermaan die gelowiges ernstig om hulle nie te laat vang deur die tradisie van allerhande mensegemaak godsdienstige handelinge nie.
  • Verbintenis aan Jesus is die enigste opsie om gelukkig te lewe (vss 19-20). Hiervoor word die beeld van 'n liggaam gebruik. Jesus is die hoof (met besluitnemingsbevoegdheid) en die gelowiges is saam aan mekaar en aan Hom verbind soos die dele van die liggaam aan mekaar en aan die hoof verbind is.

  Terug na hoofblad.